M巾勁過韓農!

話說3.7協助平等機會婦女聯席做三八行動, 針對兩位特首候選人政鋼冇女性角度, 策劃"向衛生巾學習"的記招行動, 結果發現M巾勁過韓農, 特首大屋、以至警察都怕左我地, 勁好笑, 以呈現了性禁忌與 authority的對立面.

話說3.7當天下午, 三十幾人包括團體、外傭等聚集中環太子大廈玩野. 示威物品包括我咁高的巨M巾一條, 及示威牌約廿塊, 每一塊都貼上打開的M巾一條. 我地先以兩位候選人的政鋼兩本, 進行M巾測試, 以藍威寶當頭淋落兩本政鋼上, 當然濕晒, 表示兩本政鋼都漏M完全冇女性角度. 然後袋巾12.00來到接請願信, 佢咁有心接信, 我地都比比面將條巾入落公民袋比佢, 喻意"袋好呢條巾", 不過我地事前安排示威牌貼滿打開的M巾, 記者影相時當然用M巾圍袋巾, 效果認真好睇!

戲肉係我地幾棚人操上曾大屋, 點知警察支支左左, 唔比我地去正門遞信, 迫我地行下亞里畢道的後門. 好啦, 行到上去都要圍我地, 唔比遞信, 仲要再加多一車男警圍, 後來我地懷疑M巾太多, 再來多7-8個女警圍住條大M巾, 足足三十人圍地我十二, 三人. 有主持大局男警表示, 我地咁大條巾操上曾大屋, 請願信又貼上M巾, 你叫曾特首點收先.....汗

好啦, 你地唔收, 我地就貼在牆上! 我地仲準備左條32cm夜安大m巾, 上面寫住"我要做好呢條巾", 連埋請願信貼在牆上。點知男警見係咁, 竟然唔敢拆番落黎, 搵矮過我既女警拆, 超, 我梗係貼上D啦, 鬼叫你矮過我呀. 混亂間示威物品--夜安M巾竟然跌O係地, 仲係沙展男警的鞋頭位置! 堂堂示威物品咁重要, 佢竟然唔敢執, 叫隔壁的女警執, 哈!

咁好玩既野, 都出到11份報紙, 算係咁啦。