家暴分享會之大戰哥師奶

話說得知今天YWCA在又一村會所舉行家暴論壇暨義工分享會，作為公眾教育也好，作為團體交流也成，總之談家暴又豈能不關心同性伴侶家暴情況。如是出席是次論壇，以現身提醒在場四、五十名義工，世界上還有同性伴侶的家暴同樣受到不公平對待。

在場上發表過有關同性家暴的研究報告（根據06年研究報告，達33%同性伴侶受到股體暴力、精神暴力及性暴力等家暴對待），基於社工不懂處理、社會上對同志的歧視、政府拒絕修訂家暴條例保障同性伴侶（對於異性同居伴侶卻受到保障，早前平機會法律研究已表明，如不保障同樣沒有婚姻基礎的同性同居伴侶，港府有機會違反人權法及基本法！）、再加上同性伴侶遇到問題難以向親友鄰居求助，社會簡直係見死不救。當社會談到對家暴「零容忍」，我請在坐的義工緊記，也請同樣支持對同性伴侶家暴「零容忍」，不應有差別對待！

坐談會中場休息，話說我行開去找朋友聊天時，站在朋友旁的一名師奶義工問我：
「蝦，你剛才話你地的家暴佔左33%，點解同志咁高既呢？」
我見佢好似唔係太了解，就以最簡單的字句解釋：「咁因為同志遇到社會上的歧視，加上關係又冇保障，相愛都唔可以結婚，社會上支援又少，甚至屋企又唔接受，壓力都比較大架。」
「你地唔係相愛至一齊架咩，咁都有家暴，係咪你地未確定自己呀？」
我心中暗暗扯火，唔通異性戀家暴，又唔肯定自己係直既咩：「咁你都見你地老公打老婆，唔通又係唔愛咩，你地有得結婚都有家暴啦。」
「咁你地揀呢條路，都預左架啦，呢個社會大勢係咁睇你地架嘛。」
火都黎：「咁唔通我係殘疾人士，就遇左社會有歧視咩？歧視人本身就唔岩啦。」
「拿，你又唔好咁易話人歧視，咁社會係咁睇丫嘛。」
挑！果然係一個無理性的師奶，講極都side氣。十足明光人口吻，自己歧視人就話呢d唔係歧視。最後我冇好氣同佢傾，借勢同朋友傾兩句行開。

今天遇到很典型的例子：明明覺得同志低一等，所以那不叫歧視（當係歧視，因為大家站在平等的位置上量度），即係佢地覺得同志「食得咸魚抵得渴」，這壓根兒不叫歧視，又是甚麼？